Burari Deaths Ka Occult Angle: 11 Maut, Badh Tapasya Aur Diary Ke Ankahe Rahasya

“Sant Nagar, Burari ka wo do-manzila makan aaj bhi Bharat ke sanyukt parivaaro me chhipe sabse gehre andhere ka prateek hai.”

1 July 2018 ki subah Delhi ke Burari ilaqe me jab padosi ne Chundawat parivaar ke ghar ka darwaza khola, toh unki cheekh ne poore desh ko hila kar rakh diya tha. Ghar ke aagan me lohe ki jaal se 10 log latak rahe the—aankhon par patti, kaano me cotton aur haath pichhe bandhe hue. Aur 77 saal ki dadi Narayani Devi bagal ke kamre me farsh par mrit paayi gayi thi.

Police ne ise Shared Psychotic Disorder (Folie à deux/famille) kaha. Lekin ghar ke andar mili 11 diaryon aur 11 pipes ne ek aisi occult tasveer pesh ki jo aam vigyan ke daayre se bahar thi.

1. Badh Tapasya (The Banyan Tree Ritual)

Diary me sabse chounkane wala shabd tha—‘Badh Tapasya’. Lalit (parivaar ka chhota beta) ka manna tha ki uske mrit pita Bhopal Singh uske shareer me aate hain aur use nirdesh dete hain.

Diary me likha tha: “Jaise bargad ke ped ki daaliyan hawa me latakti hain, theek usi tarah parivaar ke sabhi sadasyo ko latak kar aakhri tapashya karni hogi. Jab hawa me latkoge, zameen kaanpegi, aakash hilega aur pita ji swayam aakar sabko bacha lenge.”

Komal dimaag par andhvishwas aur adrishya shaktiyon ka prabhav kitna kaatilana ho sakta hai, ye iska sabse bada saboot tha.

2. 11 Pipes Ka Rahasya

Ghar ki deewar par theek 11 plastic pipes bahar nikle hue the—4 seedhe, 7 jhuke hue. Aur parivaar me theek 4 mard aur 7 auratein thi! Halanki contractor ne ise ventilation bataya, lekin log aaj bhi ise aatmaon ke gujarne ka rasta maante hain.

Psychology Ya Occult?

Meri kitaab Indian Midnight Stories 2 ke anusaar, Bharat me sabse bada khauf kisi bhoot ka nahi, balki parivaarik darr aur andhe vishwas ka hota hai. Burari ka case is baat ka saboot hai ki jab insaan darr aur gupt shaktiyon ke pichhe andha bhagta hai, toh wo khud apni tabahi ka rasta taiyar karta hai.